Introdukshon
Un lenga no ta un konstrukshon aislá, ku palabra òf regla ku eksepshon aki i aya, sino un sistema dinámiko i sofistiká pa kodifiká konosementu i persepshonnan humano di manera hopi sistemátiko.
Segun Wilhelm von Humboldt 1988 idioma ta energeia, manifestashon di un proseso humano kolektivo i kreativo entre hende i su pensamentu.
Sirkunstansianan sosial-kultural manera evolushon históriko, kresementu ekonómiko i nesesidatnan individual i kolektivo di papiadónan ta okashoná kresementu di nan idioma di tur dia. Pero tambe kreashon di lenganan nobo for di lenganan eksistente ku nan propio struktura, zonido i nifikashonnan partikular.
Kada lenga ta forma asina un sistema ekológiko úniko, miéntras ku nan ta alabes parti di un famia mas grandi. Papiamentu tambe.
1. Papiamentu ta lenga krioyo
Papiamentu ta forma parti di lenganan krioyo, e famia di lenga mas hóben na mundu, ku a nase alrededor di siglo16 i 17. E periodo di formashon di lenganan krioyo ta karakterisá pa e nesesidat urgente di nabegante- i negoshantennan portugues pa komuniká ku nativonan afrikano ku tabata papia diferente idioma. Esaki a resultá den un lenga di kontakto basá riba portugues mesklá ku elemento di lenganan Kua i Bantu di Afrika oksidental.
Den e periodo akí negoshi entre Europa, Afrika i Karibe tabata konsentrá prinsipalmente riba benta di katibu komo fuente prinsipal di entrada. Durante e transishon di Afrika pa Karibe e barkunan di katibu tabata pasa via di e islanan dilanti di kosta di Afrika (Kabo Verde) pa abastesé nan mes, promé ku nan krusa laman grandi. Tin biaha nan tabata hasta permanesé einan pa periodonan largu promé ku nan barka pa Karibe. Katibunan ku tabata papia diferente lenga afrikano tambe mester a komuniká ku otro den e lenga di kontakto nasiente i nan a bai Karibe kuné.
Riba e base portugues ei a nase asina lenganan nobo na diferente parti di mundu, ora ku e lenga di kontakto òf proto-portugues ei a meskla ku lenganan europeo manera hulandes (Berbice Dutch, Afrikans), portugues-spañó (Papiamentu), ingles (Creolise na Guyana, Gullah na Sur di Merka, Tok Pisin na Papua New Guinea) i franses (Kreyòl na Haiti i Seselwa na Seychelles). Esaki ta splika tambe dikon tin un kantidat di palabra portugues ku ta paresé den Papiamentu i tur otro lenga krioyo (Todd 1974).
Papiamentu a kaba di forma na islanan ABC entre 1634 i 1677 ku yegada di gruponan grandi di katibu ku a bin ta papia guene ku segun Martinus Arion 1996, ta e lenga di kontakto afrikano ku ta antesesor di nos Papiamentu di awendia.
2. Periodo di formashon
Diferente faktor a koinsidí pa krea e kondishonnan nesesario pa e lenga di kontakto ku e katibunan a bin kuné for di Afrika desaroyá i ekspandé te bira un lenga nobo i komun pa tur habitante di islanan ABC.
Un ingrediente esensial tabata e desaroyonan polítiko i sosial-ekonómiko na Europa i den Karibe den siglo 16 i 17. Hulanda ku tabata envolví den un guera ku Spaña (ku Portugal inkluí) ku a dura 80 aña (1568 -1684), tabata pirateá i purba konkistá partinan di Karibe ku tabata pertenesé na Spaña. Asina nan a bin konkistá partinan di Brazil na 1630 i islanan ABC (i SSS) na 1634. Portugal a rekonkistá Brazil for di nan na 1654 i un grupo grandi di hudiu sefardí, ku tabata aliado di e hulandesnan, a bandoná Brazil i stablesé nan mes na Kòrsou huntu ku nan katibunan.
Ku yegada di e hulandes- i e hudiunan a kuminsá un período di komèrsio i trafikashon di tur sorto di produkto i servisio entre e islanan ku a bira kolonia hulandes, Europa i kosta oksidental di Afrika. Ta trata di e.o kabai, karné i kabritu (Aruba), salu (di Boneiru/Kòrsou) pa salga piská, arma pa e diferente gueranan andando (St. Eustatius) i bendementu di katibu (Kòrsou) na gran eskala (Kenepa-Romer 2012).
E periodo di formashon di Papiamentu tabata karakterisá porlotantu pa multilengualismo, kombiná ku un nesesidat kresiente pa hablante di e diferente lenganan envolví komuniká ku otro. Hulandes tabata lenga di e grupo élite di hende blanku protestant ku no tabata inkliná pa siña otronan hulandes. Portugues tabata lenga di e élite blanku di hudiunan sefardí i nan no tabata inkliná pa siña hulandes. Banda di esei tabatin spañónan blanku, desendiente di e konkistadornan i padernan katóliko ku tabatin e mishon sagrado pa kombertí hendenan di koló liber i katibu, ku no tabata papia ni hulandes, ni portugues, ni spañó.
Esaki tabata un ingrediente prinsipal ku a influenshá kreashon di un lenga komun. El a bira un nesesidat inevitabel pa e grupo blanku papia ku otro i pa nan komuniká ku e grupo kresiente di hende di koló i katibu (Goodman 1987). Dikon? Pasobra na dado momentu Papiamentu a bira lenga materno di e poblashon di koló i di e katibunan ku huntu tabata forma mayoria di e poblashon na Kòrsou (weta e siguiente tabèl).
Banda di uso di un lenga komun pa finnan komersial manera bendementu di katibu ku doñonan di katibu di abla hulandes, spañó i portugues i e nesesidat di mishon katóliko lokal pa komuniká ku nan kreyentenan, tabatin meskla di sanger entre e diferente gruponan blanku i tambe entre nan i hende liber di koló. Papiamentu a plama asina tantu na Aruba komo na Boneiru i bira e lenga komun di nos komunidat.
Na yegada di e hulandesnan, islanan ABC ya tabata habitá. Nan a bin topa ku indjan Kaiketio di tribu Arowak, huntu ku desendientenan di e konkistadornan spañó, ku ta e promé europeanonan ku a pisa suela di Kòrsou dia 26 di yúli 1499, dia di Santa Ana.
Maske e spañónan a deportá mayoria di e indjannan pa Hispañola (awor Sto. Domingo i Haiti) nan lenga a influensiá nos habla di tur dia i residuo di palabranan indígena a bira parti integral di e Papiamentu di awendia (van Buurt, G. & Joubert, S. 1997). Nan a keda atras den nòmbernan di mata mangel, mampuritu; para trupial, pimpiri i bestia totèki, wacharaka; konseptonan den naturalesa warwarú i nòmbernan di lugá Choloma i Watamula. E desendientenan spañó ku a keda a integrá den nos komunidat miéntras ku el a bira despues e lenga ku mas ta kontribuí pa krea palabranan nobo den nos lenga (Quinn, R. A. 1971).
Durante e temporada hulandes nos islanan a konosé tambe un periodo kòrtiku (1806-1816) bou di mando ingles. Wood, R. E. 1971 ta menshoná residuo di esaki den palabranan manera bèk, blèk, blo, tou, waf, blufein, bòks, bònchi, winchi, chèns, fundeshi, djòp, lebumai, lapiston i noruechi. Hopi palabranan tékniko manera tayer, laiter, karbureiter, shòkòshòbò i digital manera kòmpiuter, tèblet, telefòn tambe ta prosedente di ingles. Ademas Ingles semper a keda un lenga importante pa islanan ABC pa motibu di su konekshon ku islanan SSS i su importansia pa komèrsio internashonal. Awendia ingles su influensia riba nivel mundial ta kresiendo i tin hasta hóbennan na islanan ABC ku ta papié komosifuera e ta nan di dos lenga materno.
Hulandes a kuminsá influensiá nos lenga for di nan yegada, prinsipalmente den gobièrnu i edukashon kaminda el a funshoná for di inisio komo e úniko lenga ofisial, te ora ku Papiamentu i ingles a bira lenganan ofisial banda di hulandes na 2007.
Tin un kantidat ekstenso di palabra hulandes ku a asimilá sistemátikamente na e sistema di zonido (pero tambe struktura i nifikashon di palabranan Papiamentu). Aki nos ta djis menshoná algun ehèmpel di kambio di zonido (R. Wood 1970):
- simplifikashon di vokalnan largu: skel, kranchi, hopi, skol;
- kambio di zonido [e] suak pa [i]: hilchi, tròshi, planchi, pulchi;
- kambio di zonido [g] pa [h]: heful, hor;
- kambio di zonido [v] pa [f]: ferdrit, ferfelu, fula;
- harmonisashon di vokal: kakalaka, kokolishi, bala;
- inklushon pa mantené struktura konsonante vokal konsonante: banki, lele, stropi;
- simplifikashon di klùster di konsonante: kref, wòrs, skref;
- pèrdida di sílaba suak: mèslá, skrufdrai, lusafè;
E indikashonnan di eksistensia di Papiamentu komo un lenga individual i independiente ta prosedente di diferente fuente históriko pertenesiente na e temporada di su formashon.
